బాలాకోట్ ఎక్కడుంది.. భారత వాయుసేన ఎలా దాడి చేసింది?

భారత వైమానిక దళాలకు చెందిన యుద్ధ విమానాలు పాక్ గడ్డపైకి ప్రవేశించి ఉగ్రవాద స్థావరాలను మట్టుబెట్టడం ఇప్పుడు హాట్ టాపిక్‌గా మారింది. పాక్‌లోని బాలాకోట్‌పై భారత్‌కు చెందిన మిరాజ్ 2000 యుద్ధ విమానాలు ఒక్కసారిగా దాడి చేశాయి. ఈ దాడిలో జైషే మహమ్మద్ ఉగ్రవాద సంస్థకు సంబంధించిన పలు స్థావరాలతో పాటు జైషే కమాండ్ కంట్రోల్ రూమ్ నామ రూపాల్లేకుండా నాశనమైంది. 300 మంది ఉగ్రవాదులు కూడా హతమైనట్లు తెలుస్తోంది. అయితే.. ఈ బాలాకోట్ ఎక్కడ ఉంది? భారత వైమానిక దళాలు అక్కడికి ఎలా వెళ్లగలిగాయి అనే అంశాలు చర్చనీయాంశంగా మారాయి.
ఇది కేవలం sample మాత్రమే ముందు ముందు ఇంకా చాలా ఉంది
పాక్ భూభాగంలో భారత సరిహద్దుకు సమీపంలో ఉన్న పట్టణాల్లో బాలాకోట్ ఒకటి. ఎల్‌వోసీ నుంచి ఇది 50 కి.మీ. దూరంలో ఉంది. పాకిస్థాన్‌ ఈశాన్య రాష్ట్రం ఖైబ‌ర్ ఫ‌క్తున్‌క్వా ప్రావిన్స్‌‌లోని మన్‌షెహర్ జిల్లాలో ఈ పట్టణం ఉంది. ఎల్‌వోసీలోని కీలక నగరమైన ముజఫరాబాద్‌కు కేవలం 24 కి.మీ. దూరంలో ఈ పట్టణం ఉంది. ముజఫరాబాద్‌ను ఎల్‌వోసీకి రాజధానిగా అభివర్ణిస్తారు.

ఉగ్రవాదులకు అడ్డాగా చారిత్రక పట్టణం..
2005 అక్టోబర్ 8న సంభవించిన భారీ భూకంపంలో బాలాకోట్ పట్టణం దారుణంగా దెబ్బతింది. ఆ తర్వాత అక్కడ ప్రజలు పెద్దగా నివాసాలు ఏర్పాటు చేసుకోలేదు. పట్టణం చుట్టూ దట్టమైన అటవీ ప్రాంతాలు ఉన్నాయి. దీంతో ఉగ్రవాద సంస్థలు దీన్ని కేంద్రంగా చేసుకొని కార్యకలాపాలు ప్రారంభించాయి. ప్రధానంగా జైషే మహమ్మద్ సంస్థ బాలాకోట్‌ను ప్రధాన కేంద్రంగా ఏర్పాటు చేసుకుంది. ఇక్కడ కమాండ్ కంట్రోల్ రూమ్ ఏర్పాటు చేసి.. భారత గడ్డపై ఉగ్రవాద దాడులకు పాల్పడుతోంది. నాడు బిన్ లాడెన్ హత్యకు ఆపరేషన్..
మ‌న్‌షెహ‌ర్‌తో పాటు భార‌త్‌తో అంత‌ర్జాతీయ స‌రిహ‌ద్దు రేఖ‌కు స‌మీపంగా ఉన్న మరో జిల్లా అబోటాబాద్. 2011లో అమెరికా దళాలు ఆల్‌ఖైదా అధినేత ఒసామా బిన్ లాడెన్‌ను కడతేర్చింది ఇక్కడే. అమెరికా నేవీ సీల్స్ అత్యంత ర‌హ‌స్యంగా నాడు ఆప‌రేష‌న్ చేప‌ట్టి.. లాడెన్‌ను మ‌ట్టుబెట్టాయి. ఆఫ్గానిస్థాన్ ఎయిర్‌బేస్ నుంచి ఆ ఆప‌రేష‌న్ చేశారు. అబోటాబాద్‌కు 60 కి.మీ. దూరంలో బాలాకోట్ ఉంది.

చరిత్రలో బాలాకోట్..
భారత ఉపఖండంలో బాలాకోట్ అత్యంత పురాతన నగరం. వందలాది ఏళ్ల కిందట అక్కడ హిందువులు అధిక సంఖ్యలో నివసించినట్లు ఆనవాల్లున్నాయి. హిందువులకు సంబంధించిన సమాధులు అనేకం ఉన్నాయి. మొఘల్ వంశస్థుల పాలనా కాలంలో బాలాకోట్ హిందువులను బలవంతంగా ఇస్లాంలోకి మత మార్పిడి చేయించినట్లు చరిత్రకారులు చెబుతున్నారు. మొఘల్ రాణి నూర్జహాన్.. బాలాకోట్ సమీపం నుంచే కశ్మీర్‌లోకి వెళ్లినట్లు ఆధారాలున్నాయి.

2005 భూకంపం తర్వాత బాలాకోట్ క్రమంగా ఉగ్రవాదుల అడ్డాగా మారింది. జైషే ఉగ్ర సంస్థకు చెందిన యూసుఫ్ అజ‌ర్ బాలాకోట్‌లో ఓ ట్రైనింగ్ సెంట‌ర్‌ను న‌డుపుతున్నాడు. జైషే చీఫ్ మ‌సూద్ అజ‌ర్‌కు బావ‌మ‌రిది అయిన యూసుఫ్ అజ‌ర్ అక్కడ ఉగ్రవాదులకు శిక్షణ ఇస్తున్నట్లు సమాచారం. భారత వాయు సేన మంగళవారం (ఫిబ్రవరి 26) నిర్వహించిన దాడిలో యూసుఫ్ అజ‌ర్ హ‌త‌మైన‌ట్లు తెలుస్తోంది. దీన్ని అధికారులు ధ్రువీకరించాల్సి ఉంది.

పాక్ గడ్డపై ఏయే ప్రాంతాల నుంచి ఏయే ఉగ్రవాద సంస్థలు తమ కార్యకలాపాలు సాగిస్తున్నాయనే అంశానికి సంబంధించి భారత అధికారుల వద్ద స్పష్టమైన సమాచారం ఉన్నట్లు తెలుస్తోంది. పుల్వామా దాడి వెనుక జైషే ఉగ్రవాద సంస్థ ప్రమేయం ఉన్నట్లు ఆధారాలు లభించాయి. ఈ నేపథ్యంలో ఆ సంస్థకు సంబంధించిన కీలక స్థావరాలున్న బాలాకోట్‌పై భారత వాయు సేన టార్గెట్ చేసింది.

Also Read: తుస్సుమన్న పాక్ బాంబ్.. డ్రోన్ అటాక్‌కూ ధీటైన బదులు

భారత వైమానిక దళం పక్కా ప్రణాళికతో బాలాకోట్ పైకి దూసుకెళ్లింది. 12 మిరాజ్ 2000 యుద్ధ విమానాలు.. పాక్ భూభాగంలో భారత సరిహద్దు నుంచి సుమారు 60 కి.మీ. దూరంలోకి దూసుకెళ్లి బీభత్సం సృష్టించాయి. 21 నిమిషాల్లోనే ఆపరేషన్ పూర్తిచేసి తిరిగొచ్చాయి. శత్రు దేశ సైన్యానికి ఏమాత్రం అవకాశం ఇవ్వకుండా వ్యూహాత్మకంగా ఈ దాడులు నిర్వహించాయి. సర్జికల్ దాడులు ఇలా..
1000 కిలోల పేలుడు పదార్థాలున్న లేజర్‌ గైడెడ్‌ బాంబులతో దూసుకెళ్లిన మిరాజ్ 2000 యుద్ధ విమానాలు మూడు ప్రాంతాలను టార్గెట్ చేసి ఉగ్ర స్థావరాలపై విరుచుకుపడ్డాయి.

* మొదటి దాడి మంగళవారం తెల్లవారుజామున 3.45 నిమిషాలకు ప్రారంభమైంది. పీవోకే రాజధాని‌ ముజఫరాబాద్‌కు 24 కిమీ దూరంలో బాలాకోట్‌‌పై 3.45 నుంచి 3.53 వరకూ బాంబుల వర్షం కురిపించింది. బాలాకోట్‌కు 30 కి.మీ. వరకు బాంబుల శబ్దం వినిపించినట్లు సమాచారం.
* బాలాకోట్‌లోని జైషే మహమ్మద్‌, లష్కరే, హిజ్బుల్‌ ఉగ్రవాద సంస్థల సంయక్త శిక్షణా శిబిరాల లక్ష్యంగా భారత్‌ ఈ దాడులు చేపట్టింది.
* మరి కొన్ని యుద్ధ విమానాలు ముజఫరాబాద్‌ ప్రాంతం లక్ష్యంగా దాడి చేశాయి. 3.48 నిమిషాల నుంచి 3.55 మధ్య అక్కడ బాంబుల వర్షం కురిపించాయి.
* చకోటి ప్రాంతంపై మూడో దాడి జరిగింది. 3.58 నుంచి 4.04 వరకూ జెట్‌ ఫైటర్స్‌ అక్కడ బాంబుల వర్షం కురిపించాయి.

భారత యుద్ధ విమానాలు పాక్ భూభాగంలోకి 1971 యుద్ధం తర్వాత మళ్లీ ఇప్పుడే ప్రవేశించాయి. 1999 కార్గిల్ యుద్ధంలోనూ భారత వాయుసేన విమానాలు ఎల్‌వోసీని దాటి వెళ్లకపోవడం గమనార్హం..

Be the first to comment

Leave a Reply

Your email address will not be published.


*